كيك بطبقات الفلون

السلام عليكم ورحمة الله وبركاته نتقاسم معاكم هد الكيك بطبقات الفلون كيطلع ممتاز وكيليق في هد الصيف نتمنى ينال إعجابكم أولا نحضر طبقة الكيك نحتاجو بيضة في حرارة الغرفة + 7معالق كبار سكر + 7معالق كبار زيت + 3معالق كبار كاكاو بودر + خمارة الحلوى من فئة 7غ +قبصةملح + 7معالق كبار حليب سائل + مابين 7 حتى 8 معالق مملوئة دقيق

الطريقة نخلط بيضة والسكر بطراب الكهربائي مزيان حتى يولي الخليط أبيض فاتح اللون نضيف قبصةملح ثم الزيت بالتدريج ثم الحليب و الكاكاو والدقيق وفي الاخير خمارة ونمزج الخليط جيدا ونسكبه في مول كيتحل من الجناب مدهون بالزبدة ومرشوش بالدقيق ثم ندخله لفرن بارد نشعل الفرن على درجة حرارة مهيلة في هد الأثناءنحضر السيرو لي نسقي به الكيك نعمل نصف كأس عنبة ماء فيه ايناء و نضيف معلقة كبيرة قهوة سريعة الذوبان ومعلقة كبيرة سكرونشعل النار عليهم حتى الغليان ونزولو من النار بعد نضوج الكيك فور خروجه نسقيه بالسيرو ونحضر الطبقة الأولى من الفلون نعمل نصف لترحليب مع فلون الفاني ونضيف له 2 معالق كبار بودر كريم باتسيير ونعملهم فوق النار مع الاستمرار بالمزج حتى يبدى يغلى ونطفي عليه ونسكبه فوق الكيك وندخله لثلاجة حتى يتماسك من بعد نوجدو الطبقة التانية نعمل نصف لتر عصير البرتقال مع فلون الفاني ونحركو مزيان ونعملو فوق النار حتى يبدى يغلى ونطفي عليه ونخرج الكيك من الثلاجة وعملت دوائر بسكوي فوقو وبديت نضيف الفلون بواسطة ملعقة كبيرة برفق باش ما تقب لي طبقة سفلى وندخل الكيك لثلاجة حتى يتماسك وبصحة والراحة